میری بیگم پیکے گئی اے
سُتی قسمت جاگ پئی اے
میری بیگم پیکے گئی اے
ہساں کھیڈاں، لُڈیاں پاواں
نچاں گاواں، موجاں ماراں
من مرضی دے کھابے کھاواں
دنیا لگے جنت جئی اے
میری بیگم پیکے گئی اے
لاہور پنڈی دی سیر کراں گا
لائلپور دی بس چڑھاں گا
اپنے سُپنے سچ کراں گا
زندگی دی رُت جاگ پئی اے
میری بیگم پیکے گئی اے
پیزا ہَٹ تے جاواں گا میں
تِکّہ بوٹی کھاواں گا میں
کَلّیاں جشن مناواں گا میں
زندگی نمانی ماڑی جئی اے
میری بیگم پیکے گئی اے
پہلے سُکھ دا سانہہ نہی آیا
کدی نواں میں سُوٹ نہی پایا
ٹچ موبائل نوں دل ترسایا
اج ای کپڑے تے جُتی لئی اے
میری بیگم پیکے گئی اے
جھاڑو پوچا ہُن نئیں لونا
خطرہ بیلن دا نئیں ہونا
چھڈ دِتا میں لُک لُک رونا
بیگم گردی سب کچھ سہی اے
میری بیگم پیکے گئی اے
جتھے چاہواں جُتی لاہواں
من مرضی دے کپڑے پاواں
مہنگے ہوٹلاں تے میں جاواں
ساری دولت کاہدے لئی اے
میری بیگم پیکے گئی اے
بیگم باجوں زندگی سوہنی
ٹینشن خرچے دی نہی ہونی
کِھل کِھل ہسّے صُورت رونی
دل وی اندروں ایہہ گل کیہی اے
میری بیگم پیکے گئی اے
روڈ گردی کراں گے رَج کے
ہوٹلاں ول ہُن جاواں گے پَج کے
بدّل وانگوں رہواں گے گج کے
تنخواہ ساری ہالے بنک اِچ پئی اے میری بیگم پیکے گئی اے.
بی پی دا وی مُک گیا رولا
سبزی ولوں وی ہوگیا ہَولا
شکر اے تیرا میرے مولا
سکون دی نِیندر آندی پئی اے
میری بیگم پیکے گئی اے
ہُن نہ بیگم چھیتی آوے
خوشیاں نوں نا نظر لگ جاوے
ایہو سوچ کے دل گھبراوے
کیپٹن دی پوری ڈبی لئی اے
میری بیگم پیکے گئی اے
سُتی قسمت جاگ پئی اے
میری بیگم پیکے گئی اے
