میجر جنرل واجد عزیز، خاموش محاذ کے نگرانتحریر:
سید عدیل گیلانی
پاکستان کی سرزمین کو محفوظ رکھنے والے اداروں میں اگر کسی خفیہ قوت کو مرکزی حیثیت حاصل ہے تو وہ ہے ملٹری انٹیلی جنس (MI) ایک ایسا ادارہ جو نہ شور مچاتا ہے، نہ جلوہ دکھاتا ہے، مگر دشمن کی چالوں کو بے نقاب کر کے وطن کے دفاع کو یقینی بناتا ہے۔ اس ادارے کی کمان آج میجر جنرل واجد عزیز جیسے جری، سنجیدہ اور پیشہ ور سپاہی کے ہاتھ میں ہے، جنہوں نے اپنے وژن، سٹریٹجک فہم، اور غیر معمولی فیصلہ سازی سے MI کو جدید دور کے تقاضوں کے مطابق مضبوط خطوط پر استوار کیا ہے۔ایم آئی (Military Intelligence) پاک فوج کا وہ حساس بازو ہے جو دشمن کے ارادوں کو وقت سے پہلے بھانپنے، اندرونی و بیرونی خطرات کی نشاندہی کرنے، اور دہشت گردی، تخریب کاری و بیرونی مداخلت کے تانے بانے توڑنے میں صفِ اول کا کردار ادا کرتا ہے۔ یہ ادارہ نہ صرف بارڈر انٹیلی جنس میں کلیدی حیثیت رکھتا ہے بلکہ دفاعی و عسکری سطح پر اہم تجزیاتی رپورٹس فراہم کرتا ہے جو فیصلوں کی بنیاد بنتی ہیں۔میجر جنرل واجد عزیز کی قیادت میں ایم آئی نے جدید ٹیکنالوجی، سائبر سیکیورٹی اور ہائبرڈ وار فیئر جیسے نئے چیلنجز سے نمٹنے کے لیے اپنے دائرہ کار کو وسعت دی ہے۔ ان کے دور میں ایم آئی نے نہ صرف سرحدوں پر دشمن کے نیٹ ورکس کو توڑا بلکہ ملک کے اندر موجود خفیہ دشمنوں کے خلاف بھی خاموش مگر فیصلہ کن کارروائیاں کیں۔بین الاقوامی سطح پر بھی ایم آئی کا کردار قابلِ فخر ہے۔ افغان بارڈر سیکیورٹی، علاقائی انٹیلی جنس تعاون، اور عالمی انسدادِ دہشت گردی فورمز میں پاکستان کی مؤثر نمائندگی اسی ادارے کی صلاحیتوں کا منہ بولتا ثبوت ہے۔ افغانستان میں ایم آئی نے انٹیلی جنس شیئرنگ، فیلڈ رپورٹنگ اور خطرات کی بروقت نشاندہی کے ذریعے خطے میں امن و استحکام کے لیے فیصلہ کن کردار ادا کیا۔ جنگ میں معلوماتی برتری ہی اصل کامیابی ہے، اور یہی قوت ایم آئی کو ممتاز بناتی ہے۔میجر جنرل واجد عزیز کی سوچ ایک خاموش مگر فعال حکمتِ عملی کی عکاس ہے۔ وہ میڈیا سے دور مگر زمینی حقائق سے باخبر رہ کر فیصلے کرتے ہیں۔ ان کا ماننا ہے کہ وطن کا دفاع صرف بندوق سے نہیں بلکہ معلومات، بصیرت اور بروقت فیصلے سے ممکن ہوتا ہے اور یہی اصول آج ایم آئی کی بنیاد ہے۔پاکستان کے اندر اور باہر سازشوں کے جال بچھانے والے عناصر کے لیے ایم آئی ایک خاموش بجلی کی مانند ہے، جو ظاہر نہیں ہوتی مگر اپنی چمک سے اندھیروں کو مٹا دیتی ہے۔ میجر جنرل واجد عزیز کے زیرِ سایہ ایم آئی نے جو پیشہ ورانہ مقام حاصل کیا ہے، وہ پاکستان کے دفاعی نظام کے لیے ایک سنگِ میل ہے۔اصل ہیرو وہی ہوتا ہے جو پسِ پردہ رہ کر تاریخ رقم کرتا ہے — اور میجر جنرل واجد عزیز انہی خاموش محاذ کے ہیروز میں سے ایک ہیں جن کی قیادت میں ایم آئی آج بھی وطنِ عزیز کے تحفظ کی اولین صف میں موجود ہے۔ 🇵🇰
